吴博士讲历史 | 美食试错



大湾区系美食之都,唔知大家有无谂过,好多美食嘅产生,可能系出于偶然、或者系搞错咗?
讲历史,觅新知,大家好,我系吴博士。
好多知名美食产品的介绍里面,关于起源,都或多或少出现过“意想不到”嘅操作失误,但系又成就咗一代美食嘅诞生。
比如双皮奶,有一种讲法系话,旧时有一位做水牛奶生意嘅顺德人,朝早煮早餐果阵,唔小心将打好嘅蛋浆倒咗入水牛奶里面,煮咗之后,点知奶分两层,又香又滑,于是诞生咗双皮奶。
又如伦教糕,系以地名命名嘅一种独特嘅白糖糕。相传系话,当日嘅产品无卖晒,就无蒸剩低嘅一桶米浆;又有讲法话系夫妻捱咗交,大家斗气都唔愿蒸。之但系,第二日用隔夜米浆蒸出来嘅白糖糕更加爽滑清甜,于是就有咗伦教糕嘅出现。
仲有九江双蒸,相传旧时南海九江嘅一间酒庄,工人唔小心将已经蒸过嘅米酒倒咗入仲未蒸嘅酵饭里面,无办法,只好再蒸一次。点知蒸多次嘅酒更加香醇独特,于是产生咗双蒸嘅工艺。
最后嘅系蚝油,好似话系煮蚝汤果阵煮过咗笼,煮干咗。但系,煮干咗嘅蚝汤香味浓郁,味道鲜美。从此之后,蚝油就几乎成为大湾区市民炒送离唔开嘅调味料。
所谓“五味调和百香生”,以上讲法系真系假,而家已经好难考究。不过咁多美食嘅起源,都不约而同咁被认为同操作失误有关。睇来美食本来就无固定法则,话唔定错有错着,唔知几时,又有一种大家都中意嘅美食,诞生系敢于尝试嘅人嘅手里面。
统筹:毛蕾
文、 出镜:吴劲雄
视频|佛山市新闻传媒中心记者刘浩斌、李宁 实习生宋灿阳、任晓泳

