热点聚焦|行西樵山、莫走野路


各位街坊注意啦!近排佛山消防救援指挥中心,接二连三收到西樵山嘅救援警情,真系睇到人心寒!
有啲游客为咗贪新鲜、走捷径,专登闯入西樵山未开发嘅山坡行山,结果冇一个唔出事——有人跣低摔伤,有人突然身体唔舒服晕倒喺山上,成日都要消防员叔叔上山救人!
大家唔好以为未开发区域有几好玩,嗰度根本冇规整嘅登山路径,周围都系陡斜坡松泥,好多地方仲系通讯盲区,一旦出事,连打电话求救都未必打得通!消防员接到通知,要扛住几十斤重嘅救援装备,喺冇路嘅山林入面披荆斩棘,一步一步搵路,遇到伤得行唔郁嘅游客,仲要几个人轮流抬住担架落山,一趟救援落嚟,成几个钟,个个都攰到散晒!
讲返转头,西樵山本身就有北门、南门、西门多条正规登山路线,沿途有清晰指示牌,仲有休息区同应急设施,想轻松啲嘅,仲可以坐观光车、缆车,一样可以睇到靓风景,咁样唔系几安全啰?
行山嘅初衷系为咗放松身心、锻炼身体,唔好为咗追求所谓嘅“小众野趣”,就将自己嘅生命安全当赌注,仲要连累消防员叔叔冒住风险去救人!
最后想奉劝各位街坊,行山一定一定要认准正规路线,敬畏自然,遵守规则,先至系对自己、对他人负责!
讲到尼度,不知视频前面的你,对于这一期话题又有什么看法呢?欢迎大家在评论区留言。
文、视频|佛山市新闻传媒中心记者谢伟、刘浩斌 实习生宋灿阳、任晓泳

