吴博士讲历史 | 佛山边个旧圩,唔怕水浸?


打开铺头做生意,最怕就系水浸街,无人帮衬,无晒数为。但系,佛山北江边有一个旧圩,就特登建系堤围外面,几百年来都唔怕水浸,广宁、四会等地嘅商户都好中意去做生意!究竟边个地方咁特别,水浸街都仲咁有吸引力嘅呢?
讲历史,觅新知。大家好,我系吴博士。
罗行,系丹灶一个好繁华嘅旧圩,地处北江支流南沙涌东面,旧时叫做“箩行”,顾名思义,就系以“箩”为主嘅竹制品商贸重镇,即系“箩”一种,就有大、中、细唔同规格,大嘅叫做箩,细嘅叫箩仔,洗菜嘅叫箩头(即筲箕)。种类繁多,包罗万有。
为咗降低人力成本,罗行充分利用河滩嘅天然优势,直接将广宁等地运来嘅毛竹拖入竹厂,悭时悭力,所以价格实惠,凡系西江、北江可以到达嘅区域,都有罗行竹制品嘅一席之地。
但系话又讲翻转头,无堤围阻隔,搬竹就易啫,大水果阵啲居民点算啊?后来我发现罗行旧时嘅屋,二楼几乎都有一个好独特嘅出口,比窗高小小,比门又窄小小,叫做“走水窗”。令我谂起细个果阵,落大雨我阿妈都会叫我上楼栓翻个“水窗”,但系,明明系天台栋门,点解叫佢做“窗”呢?直到知道罗行“走水窗”嘅作用之后,我先明白,罗行居民为咗解决水浸嘅出行问题,就将二楼临街个窗整高小小,方便水浸果阵上落船,作为“门”来用;平时无水,就栓住佢,作为“窗”来用,窄窄地,加几条木柱就可以防盗,一举两得。呢种设计,简直系珠三角地区应对水患嘅巧妙发明!建国之后,罗行外围已经建成新嘅堤围,彻底解决咗水患问题。但系,“水窗”嘅名就依然保留系丹灶北江沿岸嘅民居之中。
罗行唔单止竹编出名,晚清全国性嘅报纸《申报》都有报道,而家已经入选佛山市非物质文化遗产名录,佢下辖嘅村庄仲有一批好独特嘅地名,都系以“姓氏+斛”嘅形式,来命名某一氏族嘅聚居之地。比如劳斛、甘斛、林斛,即系以劳姓、甘姓、林姓居民为主嘅乡村。佛山确实有好多以“姓氏”搭配“家”或者“边”来命名嘅地方,比如何家、杨家,谢边、李边,但系“斛”嘅情况就非常罕见。《正字通》指出“居其地曰家”,广州话亦会将“哪里”讲成“边度”,咩家、咩边嘅地名都基本可以解释得通。但系“斛”,就真系百思不得其解喇。唔知各位老友有咩心水呢?咁独特嘅文化现象,得闲嘅话,不如来罗行一探究竟喇!
策划/毛蕾
出镜/吴劲雄
制作/刘浩斌 实习生曾佳铃

