吴博士讲历史 | 丹灶人成为荧幕主角!

佛山市新闻传媒中心

近日热播嘅电影《坪石先生》,又有南海人成为荧幕主角,佢就系抗日期间用生命守护几万本书搬迁嘅丹灶人杜定友。唔知大家有无听过佢嘅事迹呢?

讲历史,觅新知。大家好,我系吴博士。

杜定友系我国第一位获得图书馆学学位嘅学者,我哋而家可以随心咁系图书馆睇书、借书,离唔开佢嘅功劳。

杜定友系丹灶大果村人,村里面嘅《重建三忠庙碑记》有佢个名,《杜氏家谱》有佢祖、父辈嘅记载。佢阿爷杜秉涵,好早就带住一家人去香港、上海揾食;佢老豆杜顺昌系上海开咗间影相铺,杜定友就出生系上海。虽然家境一般,但系通过苦读,考上咗上海交通大学嘅前身上海工业专门学校,又保送到菲律宾大学留学。毕业之后,杜定友无留恋国外嘅优厚待遇,一心谂住要振兴我国图书馆事业,先后担任过复旦大学、交通大学、中山大学图书馆主任,广东省立图书馆馆长,被誉为“北刘(刘国钧)南杜(杜定友)”,对我国图书馆事业做出巨大贡献。

杜定友嘅贡献,主要有三方面:

第一,系杜定友担任广东省图书馆馆长之前,省图只系一个藏书楼,经过佢嘅专业推广之后,省图完成咗为民众服务嘅巨大转变,更多人可以充分咁利用图书馆嘅各种资源。

第二,杜定友大力倡导同搜集地方文献,即使系抗战期间,都唔舍得抛弃一书一簿,几乎系同图书生死相随;佢保存落来嘅大批古籍,成为咗岭南文脉传承嘅宝库。呢个,电影里面都有呈现。

第三,广东省图书馆停办多年之后,杜定友1941年系曲江主持重建,并一直担任馆长,直至将近退休。

可以讲,广东省图书馆嘅发展壮大,得益于杜定友嘅贡献;而广东省图书馆嘅创立,亦唔少得另一位丹灶人冯愿嘅功劳。冯愿系晚清举人,担任过图书科科长、中山大学教授,1912年奉命筹办广东省图书馆,并且主持编纂咗第一部书目。抗战期间,冯愿一家亦避难粤北,不过好可惜,佢无等到抗战胜利就客死他乡。

为咗纪念佢哋,广东省立中山图书馆出版咗《杜定友文集》(二十二册)、《狷斋丛稿》(冯愿,六册),又为杜定友立咗尊塑像,同孙中山塑像一齐矗立系图书馆大堂。

同《坪石先生》有关嘅,仲有一位南海人冼玉清。佢根据杜定友嘅同事徐信符,揾到嘅一部失传咗好耐嘅何维柏《天山草堂存稿》,写咗篇高水平嘅研究论文论文。有咁啱得咁轿,我系何维柏家乡丹灶沙滘村,又揾到另一个唔同嘅版本,于是整理出版咗全新嘅《何维柏集》。无形中,亦走上杜定友所倡导嘅广东文献研究之路。


策划/毛蕾

出镜/吴劲雄

制作/佛山市新闻传媒中心记者刘浩斌 实习生曾佳铃