吴博士讲历史 | “鱼中第一”,你吃过吗?


西江有一种被称为“鱼中第一”(清代吴震方《岭南杂记》)嘅鱼,唔知大家有无听过、有无食过呢?
讲历史,觅新知。大家好,我系吴博士。
早系500几年前,明代理学宗师陈献章,专门从新会来到肇庆,系《小湘峡食嘉鱼》里面盛赞“十月嘉鱼出水鲜”。清代著名史学家全祖望,千里迢迢从宁波来到肇庆之后,亦写咗首《嘉鱼》嘅诗,对嘉鱼赞不绝口。
咁嘉鱼究竟系咩鱼,得到古代学者咁高嘅评价呢?嘉鱼,系西江名贵鱼类,“其头如鼠,鳞中有脂”(《广东通志》),煮果阵鳞都唔使刮,“鲜嫩甜美,作松子香,众鱼无与为比”(《广西通志》)。
来到肇庆教书之后,我都心旭旭,好想试番下,周围咁去揾卖河鲜嘅地方,点知足足比人厄咗三年。但系,我就系唔甘心,好努力咁查咗好多资料,又参照之前买假西江鱼嘅经验,去揀可能系真嘅西江鱼。后来遇到几位好真诚、好友好嘅疍家人,先至品尝到传说中嘅嘉鱼,果种味道真系令人难忘啊。从此之后,各种各样嘅西江鱼,比如马面骨、鳎沙、白鳝、鳜花……我都试揾匀晒。
咁正宗西江鱼系咩口感嘅呢?一般认为,应该好似海鲜咁爽滑、弹牙。其实系一种错觉。正宗河鲜嘅肉质,系好绵、好嫩、好淋;最好食嘅部位唔系鱼腩,而系脊肉。可以讲,脊肉好唔好食,系判断系唔系野生西江鱼嘅重要标准。
而且,我哋平时见惯嘅鲩鱼、鲫鱼、螗虱,西江其实好少有。西江最普遍嘅,反而系赤眼、鳊鱼、鲮鱼。当然,唔同季节、唔同水域,即使系同一种鱼,口感都有可能唔同。
食鱼最讲求嘅系新鲜,两千几年前孔子就讲过“鱼馁而肉败,不食”。煮之前最后一刻先至劏,肉质系最好嘅。甚至有人为咗追求肉质嘅鲜甜而食鱼生。
后来计咗下,我前前后后揾咗几百种西江鱼资料,几乎涵括广西、广东西江流域嘅古代县志同当代著作。最令人惊喜嘅系,元代大德《南海志》竟然记载咗西江鱼中极品“三鯬鱼”(已绝迹几十年)!于是乎,我结合古代文献,一一对照而家见得到、食得到嘅各种西江鱼,梳理历史,分析特性,评价味道,写一本《西江鱼研究》,希望可以帮大家挖掘更多西江美食,从唔同角度了解深厚嘅西江文化。
文、出镜:吴劲雄 统筹:毛蕾 记者刘浩斌、李宁 实习生冼子岚

