吴博士讲历史|全国洋紫荆,都源自同一棵树?

佛山市新闻传媒中心

广东有一种好常见嘅花,几乎所有公园、大部分马路两边都有种植,开果阵,灿若烟霞,唔知大家有无醒起系乜花呢?

呢种花就系几乎无人不知嘅“紫荆”,准确来讲,应该叫做“洋紫荆”。我国本土嘅“紫荆”系灌木,主要分布系北方地区。“洋紫荆”系乔木,更适合系南方种植。由于“洋紫荆”嘅树叶比较似羊蹄,所以学名叫做“红花羊蹄甲”。“羊蹄甲”系外来品种,我国古代称之为“玲甲花”:“玲甲花,番种也。花如杜鹃,叶作两歧……夷人喜植之”(清代吴其浚《植物名实图考》)。而且,佢哋种类繁多,比如“羊蹄甲”、“宫粉羊蹄甲”、“红花羊蹄甲”,好易捞乱,好多人会笼统咁叫佢哋做“紫荆”,其实系三个唔同嘅品种。

一般来讲,“红花羊蹄甲”嘅花最艳丽最靓,“宫粉羊蹄甲”次之,“羊蹄甲”嘅就最细、颜色最单调。而且,“红花羊蹄甲”系“羊蹄甲”、“宫粉羊蹄甲”自然状态下杂交嘅品种,最大特征系只开花唔结果;最早系香港发现有一棵,由于花期长、色彩艳丽,被人通过插枝嘅方式培育到其他地方,之后又引进到广州等地,大受欢迎,于是种到周街都系。如果从遗传角度来讲,而家遍布大江南北嘅所有“红花羊蹄甲”(即洋紫荆),都系香港被发现嘅果棵树嘅后代。所以,香港将“洋紫荆”作为区花,来延续呢种独特嘅传奇。

另外,马路两边仲有一种外形好似“洋紫荆”咁灿烂,但系树干又好似木棉咁多簕嘅树,其实系从南美洲引进嘅“美丽异木棉”,同“羊蹄甲”无乜关系。

讲开又讲,我国自古以来,对于外来物种,系名称上面,都有一个显著嘅规律,就系一般都会系前面加个“胡”字、“番”字、“洋”字或者“西”字,比如胡椒、番茄、洋葱、西洋菜。

不过,系外来嘅“番”种里面,其实好多已经系“番”咗两“番”。比如番石榴,系相对于我国本土石榴而言,但系石榴系西汉张骞出使西域带翻来嘅,所以“番石榴”,应该系“番番石榴”。西生菜都系一样,因为生菜(莴苣)本来就系外来品种,所以“西生菜”,其实系“西西生菜”。

当然,亦都有一啲外来但系又无加前缀嘅品种,比如兰豆、菠菜、粟米(玉米)、木瓜。兰豆全称“荷兰豆”,菠菜全称“波斯菜”,都保留咗佢哋嘅来源信息。至于木瓜,我国本土一直都有,外形似芒果,不过好硬,不宜生食,相传唐代反贼安禄山就用木瓜掷伤过杨贵妃(《红楼梦》第十八回:“盘内盛着安禄山掷过伤了太真乳的木瓜”)。而家嘅水果木瓜,系从南美洲引入嘅,虽然无加“番”字,其实都系外来品种。

再讲一讲“番薯”,系明代“万历中,闽人得之外国”(清代周亮工《闽小纪》卷三“蕃薯”)。唔知大家有无谂过:边种蔬菜同佢嘅关系最近呢?答案有啲出乎意料,但系又在情理之中,佢哋就系:蕹菜(通菜)、牵牛花。点解咁讲呢?大家有无发现,番薯、蕹菜、牵牛嘅花,都系喇叭形嘅呢?因为佢哋都系“旋花科番薯属”,怪之得而家啲人开始食番薯叶啦,以前我哋都系攞来喂猪嘅之嘛!

孔子曾经讲过:“人莫不饮食也,鲜能知味也”(《礼记·中庸》),“多识于鸟兽草木之名”(《论语·阳货》)。听完之后,唔知大家食番薯叶果阵,有无食出蕹菜味呢?

文、出镜:吴劲雄

统筹:毛蕾

视频:佛山市新闻传媒中心记者刘浩斌 实习生曾佳铃